Athirady

முன்னாள் இராணுவத் தளபதியும் முன்னாள் முப்படைகளின் பிரதானியும் எதிர்க்கட்சிகளின் பொது வேட்பாளருமான ஜெனரல் சரத்பொன்சேகாவும் அவருடைய ஊடகச் செயலாளரான சேனக்க டி சில்வாவும் இன்றிரவு சுமார் 8மணியளவில் இராணுவப் பொலீசாரினால் விசாரணைக்கென கைது செய்யப்பட்டுள்ளதாக ஜனநாயக மக்கள் முன்னணியின் தலைவரும் பாராளுமன்ற உறுப்பினருமான மனோகணேசன் தெரிவித்துள்ளார். ஜெனரல் சரத்பொன்சேகா கொழும்பிலுள்ள அவரது அலுவலகத்தில் வைத்து கைதுசெய்யப்பட்டிருப்பதை  பொலிஸ் ஊடகப் பேச்சாளர் பிரசாத் சமரசிங்கவும் உறுதிப்படுத்தியுள்ளார். (விரிவான செய்திகள் தொடரும்..)
இலங்கையில் முன்னர் ஒருபோதுமில்லாதவாறு 14 மூத்த இராணுவஅதிகாரிகள் கடந்தவாரம் ஒரே சமயத்தில் கட்டாய ஓய்வில் அனுப்பப்பட்டுள்ளதாக இராணுவத் தலைமையக வட்டாரங்களை மேற்கோள்காட்டி செய்திகள் வெளியாகியுள்ளன. 05மேஜர் ஜெனரல்கள், 05பிரிகேடியர்கள் உட்பட 14அதிகாரிகள் கட்டாய விடுமுறையில் அனுப்பப்பட்டுள்ளனர் என இராணுவத் தலைமையகத்தைச் சேர்ந்த உயரதிகாரியொருவர் தெரிவித்துள்ளார். இவர்களில் கேர்ணல், கப்டன்தர அதிகாரிகளும் அடங்கியுள்ளனர். 1992ம் ஆண்டின் இராணுவ அதிகாரிகள் விதியின்படி இராணுவத்தளபதி இவர்களைக் கட்டாயஓய்வில் அனுப்பும் முடிவை எடுத்து அதனை நடைமுறைப்படுத்தினார் என்றும் அந்த செய்திகள் கூறுகின்றன. இவ்வாறு கட்டாயஓய்வில் அனுப்பப்பட்டவர்களில் இராணுவத் தொண்டர் படையின் தளபதி மேஜர் ஜெனரல் ஜம்மிக லியனகே, முப்படைகளின் தலைமை அதிகாரியின் அலுவலகத்தில் பணிபுரிந்த ஜெனரல் ராஜித டி சில்வா, யாழ் பாதுகாப்புப்படைத் தலைமையகத்தில் பணியாற்றிய மேஜர்ஜெனரல் சமந்தா சூர்ய பண்டார, முல்லைத்தீவு பாதுகாப்புப் படைகளின் தலைமை அலுவலகத்தைச் சேர்ந்த பிரிகேடியர் பிமல் டயஸ் போன்றவர்களும் அடங்குகின்றனர்.